الثلاثاء، يونيو ١٩، ٢٠٠٧

لا تظلموهم ..وردوا عنهم غيبتهم

مش قادر أفهم المنطق ده إلي الآن ...

فكرة إن حماس بتتحرك دلوقتي لمصلحتها والكلام ده .... هل حد متصور إن حماس اللي صبرت كل السنين دي واتحملت اعتقالات فتح وتعذيبها والغدر بيها وخيانتها عملت اللي عملته ده إلا بعدما الأمور وصلت لحد لا مينفعش السكوت عليه ؟؟...
يعني فكرة إن حماس غلطانة .....

- غزة في الأيام الأخيرة تحولت لمدينة أشباح .. الخروج للسيدات يعني اختطافهم .. السرقة والنهب كان علي عينك يا تاجر علي يد الشرطة ورجال دحلان ...

- منزل رئيس الحكومة ومقره يتعرضوا للقصف ؟؟؟ومن فلسطينيين مش من اليهود ....


- لما نوصل إن كل قيادات الحكومة معرضة للاغتيال واضطروا للاختفاء ومفيش حد يدير شئون الدولة ..

- لما المخابرات المصرية تطلب الالتقاء بيهم فيكون الرد ..مينفعش يطلعوا لأنهم لو ظهروا رجال دحلان حيقتلوهم ...

- يعني إيه حكومة كل وزرائها معرضين للاغتيال والقاتل عملاء في الداخل مش يهود ... مجموعة من الناس كل مهمتها هي المقاومة وخنقها والقضاء علي البذرة الوحيدة المتبقية تقاوم .. ومش حماس بس ... لأ حماس والجهاد واي حد متصل بالمقاومة ...

اللي نصر حزب الله في لبنان .. هو عدم وجود بينهم أمثال دحلان واللي معاه ...

وبعدين ما الناس اللي كله افتكرها دلوقتي ... كانت متبهدلة اخر بهدلة في أيام دحلان ... ليه محدش اتكلم عنها ولا جاب سيرتها أيامها ؟؟
يعني إيه أي واحد ملتحي في الشارع أو منقبة يخطفوه ويعذبوه ويقتلوه ؟؟
يعني إيه اختطاف واحد زي عمر الرنتيسي ابن أخو الشهيد عبد العزيز الرنتيسي قبلها بأيام وتعذيبه وقتله ؟؟
يعني كل المدنيين الي بنتكلم عنهم دول ... كانوا عايشين في رعب الأيام الفائتة وبسبب دحلان ورجالته .... حماس اللي عملته دلوقتي إنها وقفت حالة الرعب دي ....
بأي منطق وبأي صبر ممكن حد يتحمل وضع زي ده ؟

النقطة الثانية ...

بعض العنف اللي شفناه ... كله مرفوض ولكن ....هل حماس دول بشر لا حاجة تانية ...؟
يعني واحد شاف قدامه الشخص اللي عذبه وقتل أبوه وكان عامل رعب له ولأهله ... إيه المتصور فعله ؟؟؟

يعني إحنا هنا في مصر ...بنقول أمن الدولة وعملوا وسووا والكلام ده كله ...هناك دحلان واللي معاه ألعن مية مرة من أمن الدولة اللي عندنا هنا ...مين السبب في قتل أحمد يس والرنتيسي وآلاف غيرهم ؟؟

قادة الجهاد وحماس والجبهة وكل المقاومة قضوا في سجون السلطة أكثر من اللي قضوه في سجون اليهود ....ورغم كل ده .. كان الدم الفلسطيني خط أحمر ... والوحيد الللي التزم بالخط ده حماس والجهاد والمقاومة....لكن الوضع دلوقتي وصل لمرحلة لا يمكن السكوت عليها ... باعتراف بعض قادة فتح ... واللي شاف قناة الأقصي "قناة خاصة بحماس" حيشوف الفضايح اللي لقوها داخل المقرات دي ....

أحدث وسائل التعذيب العصرية ... بيانات فاضية عليها لوجو وامضاء حماس وناقص يكتبوا فيها أي حاجة ويوزعوها باسم حماس ... عدد القتلي اللي لقوهم داخل التلاجات داخل المقرات شيء فظيع .... شهادات تقدير مختومة بأختام إسرائيلية لقادة الشرطة الفلسطينية ... طلبات وأوراق مذيلة بتوقيعات اسرائيلية

وبعد الصبر ده كله ...
لازم يكون في نتيجة عكسية ... واللي يعرف التربية اللي بيترب عليهم الناس هناك .. ده كده منتهي الصبر .. ولا تتوقعوا إنكم لو في مكانهم حتصبروا ربع الصبر ده ....

ثالث حاجة ....
القضية هناك أساسا مؤسلمة جدا ... وده الطبيعي في حالة تحرير في أرض مقدسة زي فلسطين ... فمنتوقش يطلعوا يتكلموا بلهجة غير دي ... ولكل أسلوبه ..

نهاية ....
رجاء رجاء ....لا تظلموهم ...
فمن يتحمل عنا جميعا إثم السكوت هم ...
ومن يدفع عنا العار في ظل استسلامنا المهين هم ...
ومن يكنب لنا قصص للبطولة نحكيها لأبنائنا هم ...
ومن يرفع عنا الوزر أما الله هم ...

ادعوا لهم .... ادعوا لهم

هناك ١٥ تعليقًا:

ibn nasser - ابن ناصر يقول...

انت لسه ماستوعبتش !! ظلم ايه دي مؤامره ولعب دوليه للقضاء عل حماس دلوقتي اليهود محاصرين غزه بعشرين الف جندي ومستدين للقتال وانهاء حماس


تحياي

الحلم العربي يقول...

أنا بصراحة ما كنتش متابعة أوي لأنى اليومين دول مطحونة في الشغل لكن كنت بسمع من بعيد لبعيد و كنت بحزن جدا ان الوضع بقى كده
ان الواحد بدل ما يمد ايده يدافع عن بلده ضد العدو بيضطر انه يدافع عن بلده ضد ابناء بلده ....جرح كبير جدا

المحزن و المخزي و المؤسف بجد هو موقف الحكومات اعلربية المتخاذلة

بجد أنا بدعي لاخواننا الشرفاء في فلسطين ربنا يثبتهم و ينصرهم و يرد كيد الأعداء و الخونة في نحورهم

تحياتي للتوضيح
كلامك وضحلي حاجات كتير في القضية
شكرا

أندلس يقول...

سبحان الله فعلا معرفش ليه الناس كلها ابتدت تهاجم حماس مؤخرا
حتى لو الأسباب بعضها قاببل للمناقشة
احنا ما عندنش ما يؤهلنا لحكم عليهم أبدا ولا نقدهم بأي شكل
نعمل ربعهم وبعدين نتكلم
ربنا يصلح الحال

Alaa يقول...

على فكرة
المشكلة دلوقتي اصبحت ان جميع اتباع حماس مطاردين في جميع محافظات فلسطين
و الاجهزة الامنية تنتهك حرماتهم و تتعدى عليهم بالضرب و غيره
حسبنا الله و نعم الوكيل في العملاء الخونة

محمد السيد..مش حاسكت يقول...

ابن ناصر ....


كلنا استوعبنا دلوقتي ....

مقال فهمي هويدي بيقول كل حاجة ... ربنا يكون في عو حماس وشرفاء فلسطين ....


الحلم العربي ....

موقف الحكومات ... متلازم مع موقف عملاء الداخل ... متلازم مع أمريكا وإسرائيل ... متلازم مع بعض الي حنسمعهم علي الفضائيات والجرايد الأيام الجاية ....

ربنا يستر علينا ....

لا شكر علي واجب يا افندم ...
وربنا يجعله عامر ...


أندلس

كل زاحد بيعمل منظر ومفكر ويفضل يحكم عليهم وينسي تاريخ من الصبر ةالبهدلة استحملوه ...

أدعوك لقراءة مقال الأستاذ فهمي هويدي .... .

محاولة لفهم ما جرى في غزة ‏ ....... أ/ فهمى هويدى

http://www.egyptwindow.net/modules.php?name=News&file=article&sid=5671

علاء باشا ....

دي أقل حاجة من اللي حنشوفه الأيام الجاية ...

سيعلو صوت من لا صوت لهم .... وستسمع كلمات وشعارات ,,تذهل من خروجها من انسان يفهم ويشعر ويحس ....

mo'men mohamed يقول...

احنا والله ما بنظلم حماس
بالعكس الحق مع حماس
وربنا ينصرهم على عدوهم
سواء كان عصابه دحلان او اليهود
وحسبى الله ونعم الوكيل
جزاك الله كل خير

غير معرف يقول...

خلط الدين - أى دين - بالسياسة ينتج كارثة
رأينا خلط الدين بالسياسة فى أفغانستان .. و رأينا ماذا فعل نظام طالبان بالناس هناك .. و رأينا هذا الخلط السودان على يد المحاكم الإسلامية و النهاية كانت حرب فى منطقة لا تحتمل الحروب أصلا .. و نرى الآن خلط الدين بالسياسة فى العراق و نتائجه .. و خلط الدين بالسياسة فى لبنان و نتائجه و رأينا خلط الدين بالسياسة فى الإدارة الأمريكية الحالية و نتائجه الوخيمة .. بوش إعتقد أن الله يكلمه فأصبحت كل أفعاله - فى نظره - فى خدمة الله .. و بن لادن و كل الجماعات الإسلامية تعتقد إنها تقيم الدين و كل من خالفها فهو خارج عن الدين .. و من هذا المنطلق يحدث ما يحدث فى كل العالم الآن .. سواء كان السبب هو خلط الدين الإسلامى بالسياسة أو خلط الدين المسيحى بالسياسة .. الدين علاقة خاصة جدا بين العبد و ربه لا يجوز خلطها أبدا بالسياسة تحت أى ظرف من الظروف و إلا تحول الأمر إلى كارثة .. ذلك لأن كل صاحب ديانة يعتبر ديانته هى الحق المطلق الذى يجب أن يتبعه كل الناس

صاحب البوابــة يقول...

لكن الحق سيخرج من بين أنقاض الركام

ليغدو رمزاً خالداً

تحياتي

نقطة مية يقول...

اللي بيحصل في فلسطين ده مهزلة بكل المقاييس....الصراع على كرسي فوق الرماد...
لا حول ولا قوة الا بالله

عاشقة الوطن يقول...

السلام عليكم
ازيك يامحمد
وازى التدوين

بالنسبة لحماس فلهم الله
وربنا يقدرنا على نصرهم
لو قدرنا ننصرهم بمشئية الله

ربنا معاهم ويتولاهم ويتولانا

تحياتى

محمد السيد..مش حاسكت يقول...

نسر الشرق

ناقص إننا ندعي لهم بس ... ونوعي الناس بحقيقة الموضوع

محمد السيد..مش حاسكت يقول...

مجهول ...

خلط الدين بالسياسة .... هل كل اللي بتقوله نتيجة خلط الدين بالسياسة ؟
ثم إن في بلاوي كتيييرة كانت بتحصل .. وبدون تدخل الدين ... ساعتها كان ايه السبب؟

الخطأ يا أفندم كان التمسك بالرأي الواحد وتصور العصمة .. والانفراد بالقرار ..

وفي النهاية ...
انتظر موضوع مستقل عن الناحية دي

محمد السيد..مش حاسكت يقول...

صاحب البوابة ...

شرفت يا أفندم ... نورت اسكندرية ياريس ..
الحق خالد مخلد ... ويوما بعد يوم ...رموزنا سترسم الحقيقة ... وسترسم لنا المستقبل

محمد السيد..مش حاسكت يقول...

نقطة مية ...
لسة بتقولي برضه إنه صراع علي السلطة ؟
طيب ايه الحل مع كم العملاء دول .. اللي اشاعوا في فلسطين الفوضي والبهدلة ...
هل ساعتها كانت حماس المفروض تسكت علي الكلام ده؟
مش هي الحكومة المنتخبة؟ االلي المفروض تحافظ علي الأمن والأمان وده مسئولية اي حكومة ... ايه المفروض يتعمل لو حد طلع في محافظة من محافظات مصر واستولي علي كل حاجة فيها؟ ايه يتعمل ؟؟

تحياتي .. ودعواتي ...

وشكرا يا أفندم علي الزيارة

محمد السيد..مش حاسكت يقول...

عاشقة الوطن ...
حماس ... ربنا يقدرنا ننصرهم ونحميهم ونساعدهم .. وندفع عنهم أذي الناس

--------------------------
التدوين يا أفندم..... بخيييييييير طول ما انت بخيييييييييير
دعواتي