الثلاثاء، يونيو ١٢، ٢٠٠٧

يالا ...فرصة نتكلم عن نفسنا شوية


جالي تاج النهادرة من السيد المبجل المحترم .... ابن خالي العزيز .... ياسر مدني "دينامو الإخوان" كما يطلق علي فخامته ....

والصراحة احترت أجاوب ولا مش أجاوب ... لكن في النهاية ....

التاااااااااااااااج علينا حق

- أنت مين ؟؟

أنا ياسيدي ... محمد السيد سليمان ....
في العشرينات من العمر .... إسكندرية ... وإسكندراني أوي كمان ... حلمي الأول الإعلام .... والبلد دي اختارت لي أدرس برمجة وحاسبات ومعلومات ... لا وغيه ؟؟ جامعة حلون كمان .... واللي ميعرفهاش إوعي يروح هناك أبدا .... وحسبي الله ونعم الوكيل .... "ليه جبت السيرة دي بس؟" حنقول إيه بس ...قدرنا ...

وممكن نزود شوية في السؤال ده ....
تقدر تقول .... محمد السيد برضه .... واحد من شباب الإخوان وشايف إن دي أكبر حاجة ربنا كرمه بيها .... معاهم من ابتدائي في المدرسة لغاية دلوقتي وربنا يثبتنا ....

بأحلم اشتغل في الإعلام ...صحافة أو تليفزيون ... ومش صحافة أوي ... بمعني اللف والأخبار والمصادر وكده ... لأ ... تقدر تقول الكتابة ...
حاجة تاني ؟

- مين أكثر ست شخصيات بتحبهم ؟؟؟

ليه الإحراج ده بس ؟

ممكن اقولهم من غير ترتيب ... ماشي ؟
- عمر محمود ... ربنا يبارك لي فيه .. ويخليني جزء ولو صغير منه ...
- عـ .... صاحبة الفضل الكبير عليا ... واتعملت منها كتير في سن كنت لسة بأدخل فيه علي الدنيا والناس ...
- يـ .... صاحبة أجمل أمنية ممكن يتمناه واحد في سني ... ربنا يجمعني بيك علي خير دايما في الدنيا والآخرة ...
- عمار مطيع ... أهه إنت بالذات ... لا بتحب تقرا ولا عاجباك السياسة والإعلام والكلام ده ... بس برضه حأحبك يا ابني ...
يا حنين .... متضحكش أوي بأهزر .. أحسن تصدق إنك حنين بجد ؟
- عمر أخويا ....
وابني وضنايا ... وأخويا الصغير اللي بيكبر قدامي وبأدعي له ربنا يكرمه ويلاقي نفسه في البلد دي ... عمر ده فعلا من المفكرين والعباقرة والأطفال الي مش عاديين وهو في السن ده ....
12 سنة ... وخلي إبراهيم الفقي والحاجات اللي بتقراها دي تنفعك ..... وأنا عارف إنها إن شاء الله حتنفعك ... يارب ...
قولوا بسم الله ما شاء الله .... قولوا يالا .... قولوا ...

أنت سعيد ؟؟

الحمد لله ... جدا جد جدا ...
أنا مش من النوع اللي يقول في مشاكل وفي كذا وكذا والدنيا ضلمة ومحتار ومش عراف إيه وكلام الإحباط ده ...
الدنيا دي حلوة أوي أوي أوي .... وفيها حاجاااااااااات كتير زي العسل ... وأي حاجة وحشة بتحصل لازم يكون بعدها حاجات حلوة ...
يبقي ليه مبقاش سعيد؟

- لو اتجمعت إنت وحسني مبارك في أوضة واحدة حتقوله إيه ؟
ده بقي السؤال اللي وقفني كتير ... بس حاسس إنه حيصعب عليا ...
مش عايز تعليق ... علي قد ما مش بأحب الراجل ده علي قد ما هو بجد صعبان عليا ..
- لو معاك مليون ونص حتعمل بيهم إيه ؟
أول مشروع حأعمله أول ما يكون معايا ألف جنيه مش مليون ونص ... إني أتجوز من اللي عايزها .. مش عايز ضحك .. عشان شايف ناس بترمي كلام ....

أيوة حأتجوز... وأعيش معاها في اي حتة تكون أربع حيطان تجمعنا مع بعض ... كفاية إن أول واحد تشوفه الصبح يكون هي ... وآخر كلمة تسمعها بالليل .. كلمة تصبح علي خير منها ...

ابقوا فكروني أكلمكم عليها وعلي أحلامي معاها .... بس هي ترضي بس .... " الواحد مبيعرفش يتقل خالص صدقوني "
صحيح .... باقي المليون ونص حأصرف بيهم علي نفسي وأتفرغ للإبداعات والكتابة وأي مشاريع خاصة بيا تكون مش بتجيب دخل مالي ...
- بتحب مصر ؟؟؟
يووووووووووووووووه .... من يومين كنت راكب عربية وقعدت أفكر في كده ... قد إيه بحبها وقد إيه مالكة عليا كل حاجة بجد .. ونفسي أشوفها وأشوف ناسها أحسن ناس في الدنيا ....

- بتحب البنات ؟؟؟
إحم إحم ..... إيه السؤال ده ؟
لو مش حأحب البنات .. حأحب مين يعني ؟؟؟

ليه ؟؟
نعم يا أخويا ؟؟؟؟ ده إنت مصر بقي ....
البنت ... أحلي حاجة في الدنيا ... البنت لما تكون بتحبك وواقفة جنبك بجد ....
كتير بأفكر فيها .. وكثير بأفكر إني نفسي عيالي يكونوا بنات .... نسمة هادية رقيقة تكون في البيت كده ... حد حنين يكون جنبك .... حد يحسسك بأمان الدنيا كلها وهي جنبك وإنت جنبها ...
أنا مؤمن جدا بالبنت ودورها معايا .. وإني من غيرها مأقدرش أعمل أي حاجة ... ولو بجد اتنين اتجمعوا وهم بيحبوا بعض حياتهم حتكون أحلي وأنجح وأريح وأحسن في كل حاجة ...
المهم يفضلوا يحبوا بعض ... ممكن ؟

- إيه أكثر موقف محرج اتعرضت له؟
ممممممـ
كثير علي ما أظن ... مفيش حاجة في دماغي دلوقتي ...
بس مثلا بأتحرج لما يكون ليا فلوس مع حد .... وياسلام لما آجي أحاسب حد علي حاجة عملتها له .... صاحبكم زبون عسل في الحكاية دي ....
- اتصرفت إزاي ؟
حأعمل إيه يعني ؟؟؟ ربنا ما يوقعكم في حكاية زي دي ...
- إيه الامنية اللي بتدعي ربنا إنه يحققها لك ؟
ممكن اقول أكثر من دعاء بأحرص عليه في كل صلاة ؟
حتي لو مش ممكن حأقول برضه ؟ إيه العالم الغريبة دي ؟
1- ربنا يجمعني باللي في بالي ...
2- إني ألاقي نفسي في الإعلام ...
3- موقع عشرينات ... بأدعي علي طول ربنا يجمعني باللي فيه علي خير ... لأنه بجد حلم عشته من بدايته ,يمكن قل كتثر من اللي فيه دلوقتي ما يعرفوه ... وأكيد حييجي يوم أكتب عنه ... يمكن كتير بأفكر لو اشتغلت فيه إيه اللي يحصل؟
4- في أشخاص بأدعي لهم في كل صلاة ... يارب يجمعني بيهم دايما علي خير ... وخايف بجد الدنيا تفرقنا ... سامعين ؟؟؟ ادعوا لي بقي ....
5- ربنا ينفع بيا الإخوان ... وأقدر أعمل حاجة تكون فعلا ليها أثر فيهم ...
6- سادس حاجة ربنا يعدل حال البلد دي وحكامها وشعبها ... وترجع تاني بلادي حرة مستقلة ...

* الصورة اللي فوق دي
"يحيي"
باشا هو اللي عملها ... يوم ما الداخلية المصرية طلبتني أخلص شغل معاها ... لمدة أسبوعين .... وحسبي الله ونعم الوكيل فيك يا أبو نسمة ....

هناك ١٥ تعليقًا:

ياسر مدني ...دينامو الإخوان يقول...

شكرا علي الرد يا باشا
والله الردود جميله جدا
وربنا يعزك ويخليك لتيجاني
أصدي ليه

يلا مع السلامه

Alaa يقول...

عقبال ما نحضر يوم فرحك ان شاء الله يا حاج محمد
شد حيلك :)

أحمد عبد الفتاح يقول...

والله يا ابني الواحد لو معاه 100 ج مش مليون ونص كان راح اتجور
ومن غير صباح الخير حتي الجواز حلو ده جواز يابا
بس نقول ايه قدرنا

ابوزياد الفاتح يقول...

ردودك جميله جدا والله
ايه الروعه دى
باقولك
ابقى ادعينى يوم فرحك ضرورى
علشان اقرصك فى ركبتك
احصلك فى جمعتك

اوعى تنسى اه
ادينى قلتلك
والا هازعل منك بجد بقى
وادعيلى
ابقى شرفنى بالزياره
سلام عليكم

منة الله يقول...

محمد

ادعوك للمشاركة في استطلاع راي

عن اكثر عشرة مدونات تاثيرا في قرائها

عل مدونتك واحدة منهم

اليك الرابط

http://www.6ef.blogspot.com/

مشروع انسان يقول...

السلام عليكم
ايه الحب اللى مالى حياتك ده واعتزازك بالمراة ربنا يكرمك فعلا عندك حق وربنا يجمعك مع من تحب فى اقرب فرصة يا رب وتكمل الحب ده بعد الزواج واهلا بالاسكندرية واولادها انا اتبهدلت من ناس كنت بشتغل معاهم من الاسكندرية من حبايبنا اذا شفتهم تانى ممكن ابلغ عنهم ههههههههه الله يسامحهم بس طبعا مش كل الناس كده انتو بالنسبة لينا قدوة ومثل اخوان الاسكندرية اجدع اخوان

محمد السيد..مش حاسكت يقول...

ياسر مدني ...دينامو الإخوان...

ماشي يا عم ياسر ... عشان تعرف بس مقدرينك إزاي ...

كده ممكن تعمل لي التمثال وتحطه في دخلة البيت عندكم ...

ـــــــــــــــــ

علاء بيه شخصيا ...

يا مراحب يا مراحب ...

يا عم ايه النور ده ابقي نورنا علي طول كده

وحابقي أعزمك ... وعليك التذكرة انت ...

ـــــــــــــــــ

أحمد عبد الفتاح

ده رأيي برضه ... هات انت ال100 جنيه .. وأنا حاتجوز ..

محمد السيد..مش حاسكت يقول...

ابوزياد الفاتح

الردود جميلة ؟... يمكن من فقعتي ...

بيقولك مليون ونص ياعم .... تقول ايه لواحد بيسألك سؤال زي ده ؟؟؟



منة الله ....

طلبك وصل يأ أفندم ... وأدينا حنزور ونلف وندور كمان ..

ونعمل كل حاجة كمان


ـــــــــــــــ

إمام الجيل ....

يا عم سبونا نحب شوية .. حتي علي النت مش حنعرف نحب ....

وبعدين تعالي هنا؟؟

مالهم الإسكندرانية ...

سامعك بتقول أجدع ناس....
أيوة كده ..


أجدع ناااااااااااااااااااااس

الحلم العربي يقول...

تعليقات جميلة و تشرفنا بمعرفتك عن طريقها

ربنا يوفقك و يحققلك كل اللى بتحلم بيه ...و من ناحية الصحافة انا شايفة انك تنفع كاتب جامد جدا ..لا و كمان بتخلص شغل لأمن الدولة ....ههههههههه

إلى الأمام

تحياتي

محمد السيد..مش حاسكت يقول...

الحلم العربي ...

ماشي يا أفندم ...

لا وأحلي شغل كمان ...

وبيأكلونا ويشربونا وينيمونا كمان ..

مشفتنيش إنت وأنا نايم علي السرير ابو دورين ... لا وإيه نايم فوق كمان ...

MOSLEMA - مُسلِمَة يقول...

السلام عليكم ورحمة الله وبركاته

الحمد لله رب العالمين بدأت عالم التدوين
واللهم افتح بها وبي لأمتنا

ومنتظرين حضراتكم

وياريت تاركونا وردنا الجماعي على……..

www.ana-moslema.blogspot.com

mohamed elbanna يقول...

طيب وتسيب المدرسة ليه يا مولانا
خليك فيها وربنا يكرمك ان شاء الله
دى نصيحتى
سيبك منى ومن اللى بفكر فيه
كل واحد بيختار الطريق اللى بيظن انه يوصله للجنه وربنا من رحمته وعدلة خلى فى طرق كتير للجنه
المهم يكون فى طريق
صباحك فل وشكرا على مرورك

عمر عاشق القرآن يقول...

ماشى يا عم اتكلم عن نفسك براحتك
نسال الله الاخلاص

قصدى تشرفنا

يا مراكبي يقول...

ردود ظريفة جدا .. بس كنت بتعمل إيه في الداخلية لمدة إسبوعين؟

:-D

محمد السيد..مش حاسكت يقول...

أستاذنا البنا ...

الحمد لله علي نعم ربنا الكثيرة .. ويارب يثبتنا ونقدر نعمل حاجة نقابل بيها وجه كريم ....
المهم الجنة ....

شكرا كتيييييير علي مرور سعادتك

ــــــــــــــــــــ
Omar مشروع بطل ...
أهه إنت بقي أكثر من مرة أقول أعلق ولا أرد عليك ... والكمبيوتر يخونني ... حنعمل إيه ..استحملنا يا أفندم ....

بنحاول نسيب حاجة لأولادنا والأجيال اللي جاية ...

نسأل الله الإخلاص برضه ....
سلام عليكم

ـــــــــــــــ

يا مراكبي ....

حأعمل إيه بس ... الناس في الداخلية ميقدروش يمشي حاجة من غير ما ياخدوا راي الواحد شوية ....

وأنا مصري وأبويا مصري ... ولما مصر تناديني وتحتاجني .. لا ممكن ابدا مردش عليها ...

وجسبي والله ونعم الوكيل فيك يا..........