الأحد، أغسطس 12، 2007

اعترافات ليلية .. اعترافاتي أنا .. متفهوش غلط


بصوا بقي ...
-
ييجي كده من أكتر سنة وشهرين .. عملت المدونة دي .. وزي ماتقولوا كده حالة من الكسل اللامتناهية هي اللي خلت عدد التدونيات يكون بالقلة دي وكمان الكسل في عدد الردود زاد عن كلمة اللامتناهي أساسا .....
-
يوم ما بدأت-في هذا اليوم المشهود- كان التدوين لسة في بدايته .. يعني لما نقول إن يومها مكنش في مدونين إخوان أساسا بالعدد اللي شايفنه دلوقتي ... وكانت معني كملة تدوين ... هي علاء ومنال .. وائل عباس .. مالك ..وعدد قليل غيرهم بس ...
-
إنما بصراحة اللي بدأ يشدني لدنيا التدوين دي ... كان فريق عشرينات التدويني .. أحمد الهواري .. حبيب قلبي اللي يوم بعد يوم بأقرب له أكتر .. مصعب الخير الله يمسيه بالخير مطرح ماهو موجود .. البراء اشرف .. دعاء الشامي ..
-
وأظن في البدايات كمان كانت إيمان عبدالمنعم .. وآه صحيح ... عمرو مجدي من الجزيرة توك ....
أما إخوانيا فكان .. يحيي اللي باعتبره فعلا من أوائل ابداعات الإخوان التدوينية ... بمدونته ياء ...
-
ليه بقي أنا عمال اقولكم كل ده ؟ ؟
- أيوة اسألوني ... ......... ها مستني !!... يالا عشان عايز أجاوب الحقيقة ..
- أيوة تمام ..... بتقولوا ليه ؟ :(
- اقولكم أنا ... في أكتر من سنة .. حالة من الكسل اللي انا مش عارف أبررها دي .. عشت فترة اقول لما أنسق المدونة كويس حأبدأ.. بعد كده لما أخلص امتحانات والمشروع ... بعد كده مش عارف إيه .. بعد كده مشغول في امتحانات تاني .. وهكذا دواليك ....
-
حلوة دواليك دي ؟؟؟ ... عشان تعرفوا بس إن إحنا لينا فيها >:)
-
وكنت ماشي في السكة دي لكن ......
-
هنا بقي لأ ..... لأ بقي .... لآ وعشروميت لأ كمان ...
--
هي إيه؟ .. تكية؟ .. هي عشان المدونة ببلاش يعني ومش دافع فيها حأقضيها كده ولا إيه؟
السنة كلها مكسل ومفضي نفسي يومين بس .......
-
لألألألأأأأأأأأأأأأأأأأأأأأأأأأأأأأأاااااااااااااااااااااااااا .................
-
-
حتي كمان ...-
لما أعمل فيها عم المهم ... وياما الناس تجبر بخاطري وتدخل تعلق .. أقوم أنا بقي إيه؟
-أرد ؟....
- لآ .... ده أنا بأعيش فيها دور مصطفي أمين ولا حسنين هيكل .. "حتي العالم دي ساعات بترد علي اللي يكتب لها " .. إنما أنا .... أبدااااااااااااا .....

ولا كأن حد كتب لي حاجة .. ولا كأني هنا ..... انسي ... ده لو "سعد باشا" في زمانه شافني كده كان بطل يخلي الناس تكتب له في توقيعات وعرائض ....

ولا هيئة البريد نفسها لما تشوفني كانت قفلت بيبانها وجابت ضلفها بدري بدري ...
-
وعشان كده .. من الآخر ... لما تلاقوني عامل فيها عم المهم كده ... ماتسكتوش ...
-
أنا آي نعم ساعات باكون عم المهم فعلا .. بس مش كده يعني .... هو عشان بأنزل أجيب لهم اللبن والعشا في البيت وبأروق لهم البيت هنا ابقي مشغول كده "بين قوسين ... مجتمع غير ذكوري بالمرة" :D ....
-
ماهو يا ما رجالة بتعمل كده ... وبينجزوا في أكثر من مكان ...
"ضحكة صفرا هنا لو حد يعرف يحط الرسمة"
-
سامعني ياعم إمام الجيل ... -واحد من أطيب خلق الله- .. أولا أذهلني يوم ما اتعرفت عليه .. وتاني حاجة يوم ما أصر إنه يتابعني علي المدونة لغاية ما أحترم نفسيتي وأرد علي الناس اللي مكلفة نفسها ومعلقة عندي ...ودافعة مواصلات رايح جاي وكهربا ومكلفة زيارة وقاطعة تذاكر عشان تعلق ... وفي الآخر سيادتي أأ ..... "تيييييت قص الرقابة أحسن في بنات هنا" ...
-
وعشان كده بقي
ومن هنا .. ومن مجلسي الموقر هذا .. فقد اتخذت قرارا وأرجو أن تساعدوني فيه ..

"لقد قررت أن أتنحي تماما ونهائيا عن أي منصـ ....."
-
-إيه ده ؟؟ إحم إحم ...
-
لا مش اللي فات ده ..الواحد شكله عاش الدور أوي ....
-
لقد قررت ماهو آت :-
-
1- اللي يلاقيني غبت أكتر من إسبوع "ودي مدة كبيرة علي فكرة بس معلش" من غير ما أكتب حاجة .. له الحق في إنه يعمل فيا اللي هو عايزه .. أو حتي يغرمني الغرامة اللي يحبها .... ومن جنيه ....لــ ؟؟ لــ ؟؟ يووووه ... مش لازم لكام ..بس هي غرامة وخلاص بقي ...-

2- اللي يدخل يعلق عندي ويلاقيني مش رديت عليه خلال يومين .. يبقي من حقه إنه يمسح التعليق ...."عشان خاطري بلاش" .
-
3- اللي يدخل ويعلق ويلاقيني مش بأعلق عنده يـ...... ولا أقولكم ..... بلاش دي أصلها صعبة أوي... ده عادي يعني مفيهاش حاجة ..التمسوا لي السبعين عذر يعني يا جماعة .. يمكن الكيبورد بتاعتي مش شغالة؟ .. مشغول ؟ ؟ .. متضايق؟ .. كده يعني .. "الواحد شكله بدأ ينخ".
-
4- اللي ...؟؟؟ .... اللي.... ؟؟؟ ... اللي ....؟؟
الصراحة مش لاقي حاجة تاني ....
بس اللي يلاقي أي حاجة .. .يبقي يعمل أي حاجة ... لغاية أما تلاقوني اتعدلت كده ومشيت علي الصراط المستقيم ...
-
وآخر القرارات الباب عالية بقي من فخامة حضرتنا .. محمد السيد بك ... هي التالي ...
-
- في الأيام الجابة حأحاول أعرفكم علي نفسي شوية .. يعني حأسيبني من حكاية التاجات دي .. وإن حد يبعث لي ولا محدش يبعث .....لأ ...
-
حاكتب لكم عني ...
أيوة عني أنا ...
عن كل حاجة ... وخصوصا .. فكروني أكلمكم .. عن "تيمور" اللي جوايا .....
-
- "تيمور مين؟"

- إيه ياعم السؤال ده؟ إنت مشفتش الفيلم ولا إيه ؟
- فيلم إيه؟

- كمان فيلم إيه؟

- "تيمور وشفيقة" ياريس ...

نصيحة روحوا شوفوه قبل ما أكتب ..بدل ما أحرقه لكم؟ ....... نيااهاهاهاااهاهاهااهههههههههه
-
يلا أسيبكم بقي .... وياريت تعليقاتكم ..... وإن شاء الله الردود حتنزل مطر ....

"بس يارب ميكنش المطر بتاع الصيف .. ما إنتو مجربين ....."

وياااااااااااااااارب ....

مش حاسكتتتتتتتتتتتتتتت

هناك 32 تعليقًا:

هاني جابر يقول...

السلام عليكم ورحمة الله
ايه ده انا اول تعليق يشرفني بصراحة اني اكون اول تعليق عندك يامحمد
وجميلة جدا الوقفة الي انت وقفها مع نفسك ديه
وياريت كلنا نعمل زيك
واكتر حاجه عجباني خفة دمك
ربنا يكرمك ويعزك يارب

المواطن المطحون يقول...

بحد
وقفه كده
زي بتاعه اللمبي في فلم عوكل
عايزين نطلع الاحتلال بره البلد
دا دخل العتبه وامامبه والديزه

بجد انتا تمام

truelove يقول...

بص يا محمد انا في البوست ده شكيت في قوايا العقلية حاسة اني كنت بتوه بس الحمد لله ارجع تاني وافهم انت تقصد ايه بلاش تعمل كده تاني علشان قدراتي العقلية على ادي

المواطن المطحون يقول...

علي فكره ليك سمكه عندي في مدونتي
حتي تأكل السمكه افتح هذا الرابط
صاحي وبيلعب


والسمكه دي لكل الناس اللي علقت هنا

dead man يقول...

مممممممممممم

تغييرات فكرية في الفقه التدويني بدأت تلعب في دماغك .. قلبي مش مطمن

:))

طيب يا سيدنا الكلام اللى انت قلته ده كبير .. وانت عارف الراجل اليومين دول بتربط من كيبورده.. البوست ده من يوم 12 والنهاردة 14 شوف باه الناس علقت من امتى

حاسبوا أنفسكم قبل أن تحاسبوا
ههههههههههههه

other_things يقول...

جميل

..
نصائحي العشرة إليك

أولا : لا تهتم بأحد
ثانيا : بأحد لا تهتم
عاشرا : تهتم بلا أحد
..

امام الجيل يقول...

يعنى لازم نخبط ونزعق ونكسر عشان تتحركوا ايه ده اللى عملته جاب نتيجةةةةةةةةةةةةةةةةةةةةةةةةة
الله اكبر ولله الحمد
تعرف قليل اوى ان بتطلع معايا حاجة بنتيجة انت ادتنى امل فى الحياة
ههههههههههههه
ربنا يكرمك بس انت حكمت عليا بسرعة كده ليه انت لحقت تكلمنى ربنا يبارك فيك حتى واحنا مروحين متكلمناش فى السكة قلتلك بس لقاء المرشد على اوربت بالليل قلتى اه
اهو بترد اهو يعنى ههههههههههه
ربنا يبارك فيك
بجد المدونات دى بتبقى حاجة مشتركة بينا وبين الناس يعنى لو عايز اكتب لنفسى بس طب خلاص مفتحش المدونة لحد واقف البروفايل واكتب لنفسى بقى اما اذا فتحتها واتعرفت على ناس وخالطت ناس يبقى ليهم حق علينا اننا نهتم بيهم خصوصا يا اخى اذا اهتموا بينا سبحان الله يعنى الناس تعبرك وتسيبهم اعضك يعنى
طيب خلاص هاسمك نفسى بس انت كمل فى مسيرتك دى وربنا يوفقك وعايزن نعرف مين تيمور اللى جواك ده وربنا يسهل
ادعيلى بقى

marwa salah يقول...

هو فى ايه مين طفى النور، وليه الجلد دا انت بتشتغل فى مؤسسه يا فندم!!!

انت بتدون وبتكلم عن نفسك وعنك من خلال كل اللى حواليك يعنى اللى يعلق يعلق واللى ميعلقش ميعلق (مع احترامى للناس وآرائهم) .. ليه تتعب نفسك كدا الدنيا بسيطة بسيطة بسيطة.

يلا سلام

AbdElRaHmaN Ayyash يقول...

ههههههههههههه
ايه يا عم :D
انت عامل زي مين ؟
مش عارف
بس خطوة كويسة
و انت اللي حكمت يا فندم
نعمل اللي احنا عاوزينه
سلااام

محمد السيد..مش حاسكت يقول...

هاني جابر
=============
يامراحب يامراحب بناس إسكندرية ..
أيوة كده ياعم ... خيل الجو يحلو شوية .. بدل الحر اللي احنا فيه ده ...

ربنا يكرمك يا سيدي ...

==========================
مطحون بيه ...
العتبه وامامبه والديزه؟؟؟

والله عال ..والله عال ؟؟؟
تعالي لي هنا؟؟ إنت منيين ياابني؟

خلي بالك علي نفسك ....
انت اللي تمام ياعم.

محمد السيد..مش حاسكت يقول...

truelove ....

أهه .. قلت حاجة؟؟؟

حضرتك جاية ومنورة وشوفي عاملة كام مواصلات وفطار وغدا .. ومش بعيد حجزت في فندق ولا حاجة ...

وأجي أنا ..أكسل؟؟؟

ربنا ما يجيب توهان يا ستي ... ومش عراف أقول إيه؟؟

أهلا بتشريفك ....

==================================

مطحون تاني ؟؟

صاحي وبيلعب؟؟

إيه ياسيدي ..إحنا في حلقة سمك هنا ؟؟

بس والله بجد جامدة أوي أوي أوي ..
أنا من زمان كان نفسي حد يعمل كده ..

جهدك راااائع ....
مبروك براااااااااااااءة الاختراع ... وربنا يكرمك ويباركلك يارب ....

محمد السيد..مش حاسكت يقول...

هواري بيه ...

والله كفاية إنك تدخل عندي بس ...ومش تعلق ...لأ كفاية تقرا بس...

وبعدين طبعا طبعا ...

تغييرات وتغيرات .. والفقه التدويني كمان ...

هو إحنا أي حاجة .....
إنت بتتكلم مع واحد من أحسن ........ في العالم بيـــــــ...... مممم مش عارف بيعملوا إيه ...
بس هو واحد منهم

الكلام ده كبير ... بس حنحاسب يا افندم
ربنا يسعدك كمان وكمان ويجمعني بيك علي خير

محمد السيد..مش حاسكت يقول...

بلال أفندي ...

أبو الكلام الكبير...

كل نصيحة من نصايحك دي كاتبها وناقشها وراسمها ومعلم عليها جوه جوه شرايين دمي يا ريس ...

هو إيه؟ إنت شوية في البلد دي ياعم؟؟

وانت كمان ... خد نصايحي دي ...

اوعي ...
اوعي ......
اوعي .........

تعدي الشارع وانت مش باصص حواليك

محمد السيد..مش حاسكت يقول...

إمام الجيل ....
لا ياراجل ...
أنا مش عايز أعلق علي أي كلمة انت قايلها ..
بس أي حد غالبا بيتعرف من أول كلمة أو أول نظرة الواحد يشوفه فيها ...
وده اللي أنا شفته ...

وصدقني بعدما مشيتوا جيت جري عشان أحصلكم وملحقتكوش ...

وبعدين أنا باتكلم وبأرد وباخد وأدي كمان يا سيدي ... بس بمزاجي .."معندكش حل لمزاجي ده أعدله إزاي؟"

مش لازم خبط وتكسير يعني ... إنت بس طلع لي العين الحمرا وأنا بأخاف علي طول .........
ههههههههههههه

عندي لساااااااااااااااااااااااان كبير والله

وعشان كده عملت المدونة دي ....
دعواتك ....

محمد السيد..مش حاسكت يقول...

مروة صلاح ....

لا..لا..لا..لا..لا..لا..لا ...

قولوا كلام غير ده يا جماعة ...بنفسك سعادتك؟
يعني فتحتي الكمبيوتر "هو غالبا مفتوح بس يعني أهه" وبعدين فتحتي الانترنت إكسبلورر ... وبعدين كتبتي "مش حاسكت"بالعربي أو "http://www.mesh7askot.blogspot.com/" بالإنجليزي .....

ودخلتي قريتي كمان ؟؟

وبعد كده اخترتي إرسال تعليق ؟؟

ومش كده وبس .... لأ .كمان علقتي ...
ومش كفاية ...لأ ...بعثتي التعليق ...........

إييييييييييييييييييييه ده ياربي ؟؟
أنا عملت خير إيه في دنيتي النهاردة؟
أحمدك يارب .....

الدنيا بسيطة أوي أوي كمان .. بس من غير اللي بيحبوكي وتكلميهم ويكلموكي ... مش حنعرف نعيش فيها ...

مش عارف أقول إيه ؟؟
بس ربنا يكرمك يا أفندم

محمد السيد..مش حاسكت يقول...

عبده باشا ...

عود أحمد ياسيدي ... أخيرا ....

ايه زي مين ده؟
أنا مليش زي .. أنا .. الذي لا مثيل له ولاشبيه ...

"علي فكرة أي بحد كده .. مش أنا بس يعني"

اعمل اي حاجة يا أفندم ...بس من غير ضرب ولا فلوس .. اتفقنا؟؟

عايز اشوفك بقي ... مش كده يعني ...
عم المهم ....

ابو مفراح يقول...

تصدق يا محمد
ان فعلا الواحد لما ييجى ينام او قبل ما ينام او يأتى عليه السهر و هوة لوحده بيقعد يألف حاجات و يفكر فى مواضيع
بس اوعى تعترف قدام النيابه

محمود سعيد يقول...

مش هاعلق

هه

marwa salah يقول...

يا فندم احنا الشرف لينا اننا ندخل البلوج بتاع حضرتك، وندخل عشان نعلق.

عموما تشكر يا فندم وأى خدمة

marwa salah يقول...

وأحمد الله أنى فزت بالشرف بالتعليق على تدوينك

marwa salah يقول...

(H)

اصرار أمل يقول...

أنا علقت هنا قبل كده ........
انت بتودى التعليقات فين ؟
وأخيرااا اتخذت القرار المنتظر ....
ياريت لا تتراجع عنه ..........
ننتظر القادم بصدق....

dooody13 يقول...

اخيراااااا وقبل ما اموت محمد السيد او (سوسو) زى ما بقوله كتب حاجة جديدة والله مش مصدق نفسى


بس حلوة منك المرة دى

يلا شد حيلك وورينا اسلوبك البايخ


وكتباتك الى ما لهاش لازمه

بس ورينا وخلاص

يلا مستنين

مصـ( الخير )ـعب يقول...

لما تكمل اللائحة الداخلية دي لو فيها غدا قول

علشان نفسي آجي أتغدى عندك :)

واحشني التنين

سوسكــا يقول...

والله عيلة عثثثثثثثثثل

محمد عبد القوى يقول...

ما دمت انت قررت ان تتنحى عن اى منصب.....وانت عارف الباقى، يبقى المفروض علينا نشرب المقلب ونطلع فى الشارع مظاهرة ونهتف ونقول "تيت تيت -مقص الرقابه مرة تانيه -...لاتتنحى" فهمنى يابرنس
المهم انى سنه اولى تدوين..وعدد زوار مدونتى لحد دلوقت -فى عين الحسود - 2..اه والله 2 منهم واحد صاحبى..عشان كده بادعوك انت وصحابك لزيارتى ووضع ارائكم القيمه..ما انت ساعات بتبقى مهم
مدونتى عنوانها الحريه
al-7reya2000.blogspot.com
واخيرا وليس بالاخر(مش فاهم معنى العبارة اللى فاتت) انت مدونتك جميله جدا مهضمومه قوى
سلام

Unknown يقول...

شركة مكافحة حشرات بالخبر
شركة مكافحة حشرات بالدمام
شركة مكافحة حشرات بالاحساء
شركة مكافحة حشرات بالقطيف
شركة مكافحة حشرات بالجبيل

Unknown يقول...

شركة رش مبيدات بالدمام
شركة رش مبيدات بالاحساء
شركة رش مبيدات بالقطيف

شركة مكافحة حشرات بالقطيف
شركة مكافحة حشرات بتبوك
شركة رش مبيدات بتبوك

شركة المثالية للتنظيف
شركة المثالية لمكافحة الحشرات
شركة المثالية للتنظيف بالدمام
شركة المثالية للتنظيف بالخبر
شركة المثالية لمكافحة الحشرات بالدمام
شركة المثالية لمكافحة الحشرات بالخبر

Unknown يقول...


شركة تنظيف منازل بالدمام
شركة تنظيف شقق بالدمام
شركة تنظف خزانات بالدمام
شركة شفط بيارات بالدمام
شركة مكافحة النمل الابيض بالدمام
شركة كشف تسربات المياه بالخبر
كشف تسربات المياه
شركة كشف تسربات المياة بالدمام

المثالي جروب يقول...



شركة المثالية للتنظيف
شركة المثالية للتنظيف بالدمام
شركة المثالية للتنظيف بالخبر
شركة المثالية للتنظيف بالجبيل
شركة المثالية للتنظيف بالقطيف
شركة المثالية للتنظيف بالاحساء

شركة مكافحة حشرات بالجبيل
شركة تنظيف شقق بالجبيل
شركة رش مبيدات بالجبيل
شركة تنظيف خزانات بالجبيل
شركة نقل عفش بالجبيل
شركة تسليك مجاري بالجبيل

المثالي جروب يقول...



شركة تنظيف منازل بالاحساء
شركة تنظيف بالاحساء
شركة تنظيف مجالس بالاحساء
شركة تنظيف فلل بالاحساء
شركة تنظيف شقق بالاحساء
شركة تنظيف خزانات بالاحساء
شركة تنظيف مسابح بالاحساء
شركة نقل عفش بالاحساء
شركة كشف تسربات المياه بالاحساء
شركة تسليك مجاري بالاحساء
شركة شفط بيارات بالاحساء

المثالي جروب يقول...


شركة تنظيف منازل بالقطيف
شركة تنظيف بالقطيف

شركة تنظيف منازل بالخبر
شركة تنظيف بالخبر

شركة تنظيف بالجبيل
شركة تنظيف مسابح بالجبيل
شركة تنظيف مجالس بالجبيل
شركة كشف تسربات المياه بالجبيل
شركة شفط بيارات بالجبيل
شركة مكافحة فئران بالجبيل