الثلاثاء، يوليو 31، 2007

ألمدون خانة .. ولقاء مع المدونين







طيب بقي ... بما إني حضرت معاكم أول امبارح وكنت موجود اليوم كله ... وشرفت القاهرة باستقبالي في هذا اليوم العظيم المبارك .. يبقي واجب عليا أكتب الكلمتين دول وأجري علي الله ...
نبتدي منين ؟ نبتدي مني .. مممممممم!!؟
نبتدي من الوصف الخطير اللي اتوصف لي للمكان ... حاجة كده تشرح القلب .. لو بتفكر تروح أي حتة علي وصف زي ده نصيحة بلاش ... انا قعدت اكتر من نص ساعة أدور عليه وكمان اكتر من تلات اتصالات موبايل ... خدوا بالكم موباااااااااااااااااايل .. ده غير إني قلت أجرب حظي في بيت كده قلت يشبه مركز برضه لكن ماطلعش هو ... وفي الآخر علي سبيل الصدفة لقيته ... وعلي هذا الدرج تحركت الخطوات ومعها بدأت الواقعة .. "شفتوا الكلام الكبير؟" ..
حتدخل .. حتلاقي علاء باشا منور في وسط القعدة وعلي اليمين جلست مجموعة المدونات وفي باقي المكان انتشر هؤلاء القوم .. وعن المدون خانة يتحدثون ...

بدأ الكلام عن المدون خانة واستعراض شروط الانضمام إليه؟ وإزاي الناس تلتزم بالميثاق ده؟ وإيه الرقيب عليهم ... وهنا اختلفوا علي الدعوة للأديان وهل من حق حد إنه يكتب عن كده ؟


سبب الخلاف هنا ان الناس تصورت إن "المدون خانة" حتكون مسئولة عن كل ماينشر علي المدونات المشتركة فيها ... وده غلط .. "المدون خانة" ليس لها أي قيود علي ما ينشره المدون علي مدونته لكن بقبوله ميثاق شرف المدون خانة فيبتعد علي السب والألفاظ الخارجة والتهجم علي الأديان وتشجيع الشواذ وغيره ...


بعد كده اتكلمنا عن لجان المدون خانة ....
1- لجنة المشرفين:استقبال مواضيع الأعضاء من أخبار أو مقترحات أو حملات أو تغطيات و نشرها على الموقع.
2- لجنة المبرمجي: الأعمال التقنية و الدعم الفني للموقع.
3- لجنة المصممين: أعمال تصميم الجرافيكس و البانرات و تصاميم الحملات و غيرها للموقع
4- لجنة التغطيات: تختص بتغطية الأحداث المتعلقة بالمدونين و متابعة آخر أخبارهم سواء بصور أو كتابات أو فيديو أو حوارات و غيرها.
ولو في اقتراح لأي حاجة تانية الباب مفتوح ...

بعد كده دخلنا في أقسام المدون خانة ... اقتراحات زي "فيديو خانة" .. و"أخبار المدونين" لنشر أخبار المدونين .. وهنا وضح إنه مش مقتصر علي الاعتقالات والحاجات دي بس, إنما لو حد اتنشر له حاجة في جهة أخري أو لو حد أخد جايزة أو أي أخبار عامة يعني ....

وركن تاني "للحملات" .. زي "لا لتعذيب" أو "تجار الكيف" أو "الحجاب" ....

هنا سألت السؤال اللي كان شاغلني ... إيه هي الجدوي من حاجة زي دي؟

الصراحة أنا عندي تخوف مشروع ... وهو إننا بالنسبة لنا كشباب إخوان أو مدونين ينتموا للإخوان .. تعودنا علي السير في ركب جماعة وتنظيم ومسئول ومتحدث والكلام ده ..أصبحت حالة من الإدمان .. أعترف إننا بصعوبة بالغة نتمكن من الخروج منها .. وحاجة زي المدون خانة حتمثل حالة استقطاب حاااااااادة لحاجة زي دي ...

وبالإضافة إلي إننا بدأنا نتقوقع علي نفسنا أساسا في التعليقات وفي كتابتنا علي مدوناتنا فالخوف كله إنها تصبح وسيلة أكثر تقوقعا ودفعا للإنزواء والتوحد تحت دعوي مدونات نظيفة أو ملتزمة أو غيره ....

لغاية دلوقتي مش عارف أحدد موقفي ... أنا طبعا مع "المدون خانة " في كل الأهداف .. لكن خوفي الوحيد في الحاجة الداخلية الي جوانا اللي بتوقفنا عن الانفتاح والاختلاط بالآخرين ...

ومن الحاجات اللي محيراني ....

هل هتكون مهمتها اللف علي المدونات ونشر التدوينات الجيدة؟

ولا تصميم الحملات والإعلانات؟

ولا تغطية الأخبار العامة ؟

أسئلة مجاوبناش عليها .. لكن لسة في انتظار الاقتراحات ....
هنا بقي ... أخدنا فاصل ... لصلاة المغرب .. وهنا استأذنت بعض المشاركات .. شقاوة شعب تحديدا .. والحاج حسام الهندي قعد يغلس علي واحد كان بيتوضا وأحرجنا معاه آخر إحراج .. منك لله يا جدع ... وكمان مكنش فيه مية نتوضا فبعضنا عرض إنه ينزل يتوضا ويصلي تحت ... لكن الحمد لله في الآخر صلينا وبدأنا نستكمل القعدة ...
آه صحيح .. نسيت أقولكم كان فيه .. الناس هناك قدموا لنا شوية شاي كانوا جايين في وقتهم الحقيقة ... حاجة كده تعدل الدماغ بعد يوم سفر متعب .. ولو إن مليش في الشاي أساسا ... :D
ها وصلنا لإيه ؟؟
أيوة تمام ................
بعد كده كملنا كلام عن اللجان والأاقسام, وبرزت حكاية إننا محتاجين مبرمج للموقع ؟؟ ودي في طريقها للحل بإ نالله ..

والكلام أخدنا لحكاية التدوينات العلمية وليه دي غايبة عن عالم التدوين؟ وكمان فكرة إن التدوين أحيانا بيخرج عن العربية الفصحي أوي ..البعض أيد والبعض اعترض علي الاستخدام الكثيف للعامية .. كنت منلا الموافقين علي استخدامها للصراحة :D ...
بعد كده بصينا علي التصميم المقترح للموقع .. الحقيقة عجبني .. لكن الخلاف كان علي اللون .. البعض علق إنه بناتي شوية .. وعرضوا استبداله باللون السماوي أو درجاته ... لكن بجد عجبني التصميم ..
ممم مم ....ايه بعد كده؟ ياعم محمد ؟إيه؟ .........
آه هنا جالي إمام الجيل والأول قال لي: محمد السيد؟ قلت له: ايوة .. قال لي: أنا إمام الجيل .. الصراحة مسمعتش اسمه كويس الأول .. والرجل معطنيش فرصة .. طيب وودود بشكل .. يعني إنت تكسف تحرجه ولا تكرر عليه السؤال .. قام مكلمني عن المدونين القادمي و انهم مش بيردوا علي المعلقين ومش بتفاعلوا مع الناس وإنهم عازلين نفسهم وهنا كان الحرج قد بلغ مني مبلغه .........


الحقيقة بقيت بأرد عليه وان حاسس اني مش مركب جملة واحدة صحيحة .. الأول عشان اعتبرني من القدامي ... وكونه يضمني ليهم .. إيه العظمة دي ...
تاني حاجة غنه كان معاه حق في كل كلمة .... أنا كسووووول لدرجة عالية جدا في حكاية التعليقات دي .. ويمكن مش عارف سبب لكن ... كتير بأسأل نفسي هي الناس الي بتدخل عندي دي بتدخل علي إيه؟
واحد لا بيرد عليهم .. ولا بيعلق عندهم ..يبقي ليه تاعبين نفسهم ......
- غريب؟ معلش بقي استحملوا :D .... عارفين الي حيسمع الكلام وميجيش تاني ........ حيبقي يشوف .
أستاذي إمام الجيل ...أنا كتير كتير كتير مكسوف منك ... وفعلا عايز أعتذرعن إني مسمعتش اسمك كويس .. لأني لو كنت سمعته كويس بجد كانت اختلفت طريقة سلامي عليك ..أنا كنت لسة من كام يوم باتكلم مع اختي عن تدوينك "التدوين....نظرة من الداخل " وفعلا معاك في كل كلمة فيها ..ياريت نتقابل تاني ياريت .... ولو تقدر يوم فرح بنت المهندس خيرت الشاطر ..



نستكمل بعد الفاصل

هناك 8 تعليقات:

امام الجيل يقول...

حبيبى فى الله
وانا بقول ماله مردش كويس افتكرتك متعرفش مدونتى قلت مش مشكلة
المهم انى اعرفك وخلاص وكان نفسى اتعرف عليك اكتر بس
تعرف انا اصلا مش اجتماعى اوى بس كنت متغاظ بس بحب والله
وفعلا حكاية التقوقع دى صعبة جدا خصوصا انها مش مننا يعنى الاخوان عمرهم ما كانوا متقوقعين ييجى يعملوا كده فى النت ده كلام
طيب ان شاء الله هحاول اجى اكيد والله نفسى اتعرف عليك جدا
سلام

سارة بندارى يقول...

يلا أمرنا لله هنعدى بتعليق

بعد كل اللى عرفناه ده

يلا امرنا لله

جزيتم خيرا

ابو مفراح يقول...

جزاكم الله خيرا على العرض
جميل جداتساؤلك اخى عن موضوع الحملات و ارتباط المدون خانه بحملات الجماعه واعمالها
بوركتم
ابو مفراح

بن توفيق يقول...

بعد كل ده وفيه فااااصل


اسلوب العرض خلانى اقراه لغاية الاخر

تسلم يا محمد

قرينك

مُسلِمَة يقول...

السلام عليكم ورحمة الله وبركاته
الحمد لله على كل حال لم استطع حضور الاجتماع
وربنا ييسر لنا الحال ويكرمنا في الفترة القادمة والموقع يخلص بسرعة

وبعد اذن حضراتكم


ندعوكم للمشاركة معنا في في إصلاح أمتنا في برنامج للشباب من 16- 28 عاما عملته الشركة لكي تستطيع أيها الشاب أن:
تزيد دخلك في فترةالصيف استعدادا لمصاريف الدراسة
- تحصل على كورسات زدني المعتمدة في مهارات البيع ومهارات الأتصال
sales skills & communication skills مجانا
-احضر ورشة عمل مكثفة عن الإدارة وكيفية بناء مشروعك الخاص (وأنضم لفريق مشارعنا أثناء العام الدراسي)
-دورة تدريبية لمدة أسبوع بعدها تنضم لفريق عمل ماي واي (مصر أو السعودية)
ولكي تتعرف أكثر على البرنامج بإذن الله سيعقد أجتماع في فرع الشركة في ميامي
78 ش أبو العرب بجوار كافيتريا البارون- ميامي-الأسكندرية
يوم الأحد 5/8 السادسة مساءا
وللشركة فروع أخرى في 11محافظة ولأي أستفسار الأتصال على: 0128014305 اللهم استعملنا لنصرة أمتنا وفقنا الله وإياكم إلى ما يحب ويرضي

المواطن المطحون يقول...

ايه يا ريس
كيف حالك
علي فكره انا استنيتك عشان نروح سوا لكن نعمل ايه

يوجد صور للاجتماع علي مدونتي

امام الجيل يقول...

يا بنى رد على الناس بقى
شكلى لازم اقابلك تانى بس مش هيبقى بود ساعتها ههههههه
ربنا يبارك فيك

اسلام رفاعى يقول...

عذرا للتحليق خارج السرب
من اجل رفع الظلم عن المظلومين
ادعوك للمشاركة فى حملة رفع الظلم عن الطلاب المختطفين من جامعة الاسكندرية
التفاصيل بمدونتى