الأربعاء، فبراير ٠٧، ٢٠٠٧

هل إحنا كإخوان ..فعلا ..في انتظار المحنة؟

ما ستقرأونه .. هو تعليق لي علي موضوع نشرته مني سليم في موقع ولاد البلد ... عن المحنة... عند الإخوان المسلمين ...

هل دائما في انتظار المحنة؟؟

الموضع جميل ... فكرا... و رأيا...وتناولا....وحيادا....نيجي بقي نتناقش في أفكاره ؟؟

"لماذا لا يغيرون ويجددون أنفسهم سياسيا وحركيا حتى يتغير ما بهم؟"لو عكست لك السؤال وطرحته عليكي ؟؟ يعني يعملوا إيه؟ ما البدائل المتاحة أو الغير متاحة ممكن بها إيقاف هجمات النظام عليهم؟؟الطبيعي إن أي ديكتاتور ... لازم يهاجم ويتجبر ويمنع ويسجن أي معارضة أمامه ؟؟؟ المفروض نغير إيه؟

"فكرة التمحيص ..." قد تكون موجودة فعلا ...بس مش معايا إن ده لمصلحة الجماعة ... ولمصلحة العمل كله؟؟ يعني مش طبيعي يكون في تجارب و وسائل ممكن تظهرلك بعض البيض الغير صالح في السلة ؟؟ أو العكس تظهر لك بعض الثمار المثرة أكثر من غيرها ؟؟؟

عن تجربة سابقة أقولك ... إن فعلا السجن أحد الوسائل التربوية عند الإخوان المسلمين ...

ولو بنظرة شاملة بعض الشئ .. حتلاقيها عند غيرهم كمان ..كل المناضلين والمفكرين واللي غيروا التاريخ .... مروا بالتجربة دي ... وكلامهم عن فترة سجنهم إنها كان لها دور كبير في تشكيل شخصيتهم وإصقال تجربتهم...

يبقي هنا العيب في الإخوان ...ولا الناس كلها...ولا دي تكون ميزة بشرية .. وطبيعة وفطرة إنسانية ؟؟؟

وهنا أكيد مش الجماعة هي اللي بتلقي بيه إلي السجن أو بتدفع إليه المحنة .... من أجل "اختباره"علي حد تعبيرك .... إنما الظروف ...

المشكلة الحقيقية ..إنه فعلا معسكر إخواني..في غاية الروعة

معاكي في إن الإحوان طبعا بيحولاو السجن لمعسكر روحي وتربوي ..ولكن ؟؟؟
مش أوراد وصلاوات وأذكار ققط ... السجن بيتحول إلي دورة كاملة تبدأ بالرياضة في الصباح لتمر بالسياسة والفقه والاجتماع ... لتنتهي في بالأدب في المساء ...
يعني لو فعل الإخوان إيه .... ماكانوا ليحصلوا علي هذا المعسكر التثقيفي التربوي الروحي الرياضي ..وكله علي حساب لحكومة ....
"فكرة إن الصراع مع الباطل دليل علي سيرك في الطريق الصائب ...." أنا مش بأشجعها بالناحية دي .... إنما ...
عند المقارنة ؟؟
هل نظام مبارك هو الصح؟هل أمريكا هي الصح ؟؟ هل الاستيادا وخنق الحريات والتلاعب بالشعب والنسا هو الصح ؟؟ هل الرضا بالفتات ن الحكومة والسكوت علي بعض ما ترتكبه هو الصح ؟؟ هل مصالح الناس هي الغلط ؟؟ هل الحرية العامة وحق الكل في التواجد هو الغلط ؟؟ هل غلق المعتقلات هو الغلط؟؟ هل فلسطين هي الغلط ؟؟
قد نختلف في التناول ...وتتباين رؤانا حوله .. .إنما الفكرة العامة ...تظهر مين الحق ومين الباطل .... وباللغة المتداولة .. مين الصائب ومبن الخاطئ
"تم المبالغة وتضخيم ثقافة التضحية على الجزء المتعلق ببناء الوعي السياسي وخريطة التحالفات والثقافة المستقبلية التي تعطى البناء الحركة القدرة على تلمس خطاهم , فالتكوين الثقافي لشباب الحركة لا يساعد على هذا" ثاني جملة تثير بعض التساؤل ؟؟؟
هل شباب الإخوان دول جزء من المجتمع بكل مثالبه ولالأ؟؟ يعني جزء من عدم الثقافة العامة ..وقلة الوعي ....والحاجات دي كلها ..ما يقدمه الإخوان .. هو نوع من تغيير هذه النماذج ..ومحاولة تصحيح الأوضاع ..ولكن يظل جزء يخضع لطبيعة المجتمع وظروفه ...
طيب وليه نعتبر إنه قدر علي الإخوان إنهم يتسجنوا ويتبهدلوا؟
أما "فهي حركة راكضة ولكنها غير قادرة على وضع التصور الاستراتيجي في اللحظة المناسبة" مش عارف ... أنا غير متفق تماما مع هذا الطرح ...
الأيام يوم بعد يوم بتأكد إنهم ...أكثر من يسير علي استراتيجية وفكرة واضحة وحركاتهم كلها محسوبة وفيها نظرة مبصرة للعواقب وما تأتي به الأيام ...
رأي الأستاذ جمال البنا محترم جدا ...وواقعي في طرحه فعلا ...وأظن دي وسام شرف ...وإلا المفروض نهيج الدنيا ونخليها ضرب في بعض ؟وأفخر بتمتعي بالعفة السياسة ...
أحيانا يكون التصور إن الموضوع خلاص ..وإن سهل تحريك الشارع وإن الإخوان بيسكتوا علي كثير مما يمر بهم .. وإنهم كانوا ممكن يتصرفوا ويصعدوا الموضوع ..والأدهي بقي .. عند حدوث حوارات بين الجهات الأمنية والإخوان ...
يا جماعة ..لما كام اتقبض علي بعض شباب كفاية...كله اتكلم كتير ..وكله قعد عمل مناحة علي مستقبلهم وأيامهم وحبهم لمصر وحرام اللي بيحصل ... بينما الإخوان آلاف بيمروا بنفس الظروف ومحدش بيعمل حملة عن "كل شخص فيهم" ولا أي حاجة ...
الكثيرين يتعاملوا مع عمليات القبض علي الإخوان وكأنه شئ طبيعي وجزء من اللعبة بين الإخوان والنظام ؟؟؟
الله ؟؟؟
ليه يعني ؟؟
هو قدر علي الإخوان إنهم يتسجنوا ويعتقلوا ويتبهدلوا .. ومحدش يتكلم عنهم ..أو اللي يتكلم عنهم يتكلم باعتبارهم عدد وخلاص ....؟؟
أحيانا علي فكرة ده بيسبب مرارة ... ادخلوا علي مدونة "ياء"...فيها شئ من الحديث عن هذه المرارة...

خايفين من تضارب التصريحات؟وفضلوا الصمت؟
رأي صلاح عيسي بقي ..في سبب تحويلهم للمحاكمة العسكرية ..
أولا: حسيت إنه خارج إطار لموضوع ..يعني مش عارف ليه كتبتيه هنا ...؟
ثانيا: بقي حسيت إني عايز أضحك ... مفيش حاجة اسمها فضلوا الصمت والحاجات دي والخوف من التصريحات المتضاربة.... وثقافة الابتلاء .... ده موقف سياسي جدا ...
وكلنا كنا بنعمله في القضايا المتفبركة اللي معروف نتيجتها سلفا ..لما كان وكيل النيابة بيسألنا .. ومن غير ما نرد يجاوب هو ... بالنفي ..لأنه عارف إن الموضع كله فشنك ...
علي فكرة"بين قوسين وكلاء النيابة دول من أكثر الناس احتراما فعلا ...."وهم أول ناس عارفين إن القرار مش بإيديهم ومش حتفرق أقوالنا أمامهم في أي نتيجة للتحقيق ...
بيفكرني بتحقيق أحمد باشا موسي مراسل الأهرام الأمني في وزارة الداخلية .. عن رفضهم للقانوا الوضعي والكلام ده ...وعشان كده اتحولوا للمحاكمة العسكرية...
إن شاء الله ... مش حاسكت
لا للتمديد ... لا للتوريث ... نعم لتعديل الدستور المصري

هناك ١١ تعليقًا:

محمود سعيد يقول...

كتبت انت هذا المقال نيابة عنى

بالمناسبة
وكيل النيابة بيقول لى ما هو قولك فى ما هو منسوب إليك وبسرعة قلت له: وما هو المنسوب إلى

إفتكرنى بتلامض

وقعد يقول س ويجاوب هو ج بالنفى وانا بتفرج :)

حلم الحرية يقول...

مممممممم اقول ايه ؟؟؟اقول ايه؟؟
بصراحة يعني انت اوجزت فانجزت

انا كنت حارد عالموضوع في عشرينات بس بصراحة كده.. لقيت نفسي حاقول كلام انت قلته خلاص
وسر بيني وبينك( بس اوعي تحس بنفسك وللا تصدق بعدين تبقي كارثة ) عجبني ردك اوي

شفت كنت حانسي اهم حاجة
انا لقيت نفسي كل ما اقولك عايزة اخد رايك في مواضيع المدونة تقولي مش فاضي وانك بتقرا حاجة عالنت ..متهيالي رصة بالمرة دلوقتي ممكن تدخل المدونة وتقرا وتقول رايك

اروي الطويل يقول...

على فكره انت واختك كتاباتكم جميله اوى اوى بصراحه احلى من بعض

عمر عاشق القرآن يقول...

الاخوان ال ينتظرون المحن بل المحن تنتظرهم

وتنتظر كل مخلص

وده ميمنعش ان ليا ملاحظات على اداء الاخوان اللى انا منهم و الملاحظات دى بتوصل للقيادات فى مسارها الطبيعى

عبدالمنعم محمود يقول...

محمد مدونة جميلة يمكن مشفتهاش قبل كده اسف
بس هو انت اللي بتقعد بتعلق في عشرينات
محمد السيد
لا للتوريث

IBN BAHYA - إبــن بهيـــــــــــــة يقول...

ربنا يبارك فيك .. بجد كلام رائع ورد طيب

منذ زمن بعيد أعيب على الإخوان عدم قدرتهم على الرد ومقارعة الحجة بالحجة الأقوى التي لديهم وخير دليل على ذلك هو ما نراه اليوم من هجمة شرسة جدا جدا على الإخوان
لا أقصد الهجمة الأمنية لأنها بسيطة مقارنة بغيرها ولكني أقصد الهجمة الإعلامية من النظام وزوائده الطفيلية

من العجب أن تجد الناصريين أكثر قدرة على الرد نيابة عن الإخوان أكثر من الإخوان أنفسهم
طبعا أقصد الناصريين بجد مش كده وكده يعني

عموما أتمنى تغيير رأيي قريبا حين أجد من شباب الإخوان من لديه القدرة على استيعاب التاريخ والجغرافيا والإحاطة بأحداث مائة عام خلى وأكثر من خمسين دولة بها الإخوان
وفهم عميق للحاضر

عندها ستأتي الردود القوية من هؤلاء الشباب الأفذاذ

أرق تحياتي

ياء يقول...

وعجبتنى انا كمان

Unknown يقول...

الموضوع بجد تحفه و جميل جدا واسلوبك رائع
بس بصراحه انا مش مقتنعه غير بى حاجه وحده بس ان ربنا اذا غضب على شعب سلط عليه حكامه من لا يخافه ولا يرحمهم
اكيد احنا نسهله بى اعملنا ولو فقنا ورجعنا لى ربنا مش هقول يموت ويجى واحد تانى كويس هو نفسه ممكن يفوق و ممكن يرجع لى ربنا و يحاول يصلح الى خرب
انا رئى ان المفروض جماعه الاخوان تركز بس على الدعوه و على ا الناس كلها تفوق هو ده الحل الامثل لى ظروف البلد بدل ما بتبهدلو نفسكو بدون فيده
انا اسفه ده رئى و ياريت محدش يزعل منه

عمر محمود يقول...

يا ابنى فكك بقة من الكلام على السجون والمعتقلات وتعالى نشوف حل فى الشباب المتنطور يمين وشمال وماحدش عارف يلمه
(انا باقصد شباب النت طبعا)
تعالى نحكيلهم كلام جميل عن بلادنا وأمتنا وناخد بإيدهم للإصلاح ونبطل كلام الحبسجية ده
مع إنى مقدر كلامك كويس
ومع ذلك بحبك فى الله
عمك اللى عياله عمامك

غير معرف يقول...

بعد التحيه
دى اول زياره ليه بس مدونه حلوى وبوست جامد
ولو انت مش هتسكت انا برضو مش هسكت
وربنا يقدم الى فيه الخير

محمد السيد..مش حاسكت يقول...

يااااااااااااااه يا زمن ....