الخميس، يناير 18، 2007

نفسي أعيش الحياة دي

سمعتوا عن حكاية الموبايل اللي شحنه خلاص ... ومش بيكلم حد خالص ....
نفس الموبايل ده ساعات بيعمل نفسه شحنه خالص لأنه مش بيلاقي يتصل بيه ... ولا يكلمه ...
في البيت عندنا .... كانوا أي حاجة تعطل ... يقولوا السبب هو الركنة وقلة الاستخدام
ساعات الموبايل برضه ممكن يعمل نفس الحركة ...
لأنه ..... محدش بيكلمه ....
نفسي .... في حياة زوجية ميكنش فيها الغلطات اللي بأشوفها دلوقتي ...
نفسي في حياة يكون كل واحد فيها بيفكر في الحاجت الصغيرة اللي ممكن تفرح التاني ...
نفسي في حياة أكون فيها الأول والأحير ... وتكون هي فيها ....برضه الأولي والأخيرة ...
نفسي ... أول ما نيجي نشد مع بعض ... واحد فينا ينهي الكلام ...أو ممكن نتفق علي حاجة نعملها أول ما نشد ... عشان نبطل شد ... ونسكت ساعتها ...
نفسي ....لما نتضايق من بعض ... أكون أول واحد يصالح ... وتكون هي برضه أول مين يبدأ بالكلام ...
نفسي ...لما نقعد نفتكر في ايام الخطوبة وكتب الكتاب و الفرح والأيام دي ....ونقول يااااااااااااااااه ...عشنا من ساعتها في لغاية دلوقتي في السعادة دي ....
نفسي قدام عيالنا ...صوتنا مش يعلي علي بعض أو يحسوا ..بأن في أي حاجة غلط بينا ...
نفسي ... أبوس إيديها قدامهم ... وكده يتعلموا يبوسوا إيديا وإيديها كمان ...
نفسي ... تقولهم علي طول استنوا بابا لما ييجي من الشغل عشان نبقي كلنا مع بعض ....
نفسي أسيبهم مع حمايا أو حماها في البيت ويكون لينا يوم في الاسبوع ننزل فيه مع بعض .... بس .. من غير حد تاني ...
نفسي قدام أهلها أقولها ربنا يخليكي ليا ... وهي قدام أهلي تقول ده أحسن راجل في الدنيا ...
نفسي لما أقعد مع صحابي يقعدوا يقسموا عليا وعلي بيتي وعلي الهنا و الدلع اللي معيشاني فيه ....
ونفسي قدام صحابها ..أفضل اشكر وأشكر وأشكر فيها ...لغاية ماتبقي طايرة من الفرحة ....
أقولكم باختصار!! ... نفسي معملش الحاجات الوحشة اللي بيعملنا الناس الكبار دلوقتي ....
ادعوا لي .... وإن كان فيها الخير ...ادعوا لي أكون معاها ..... ملكة اليمن السعيد ..
مش قلت لكم ؟؟؟مش عايز أسكت ...؟

هناك 13 تعليقًا:

ياء يقول...

محمد رجع يكتب يا رجاله

محمد رجع يكتب يا رجاله
محمد رجع يكتب يا رجاله
محمد رجع يكتب يا رجاله

محمد رجع يكتب يا رجالاا ااااااه


الف مبروك يا استاذ محمد احنا جمهورك العريض الذى ملا مابين المشرق والمغرب سعيد جدا بعودتك الينا سالما غانما
وكل سنه وحضرتك مش ساكت

والنصر لمصر
النصر لمصر

ياء يقول...

اياك تمسح التعليق اللى فات لحسن...انت عارف

bagabigo يقول...

حلو اوى يا محمد بجد احساسك وهمى استمر

عبدالله مفتاح يقول...

لولولولولوللولييييييي
حمدا لله على السلامة يا عزيزي

وانا كمان نفسي والله وانا كتبت قصة عن حاجة زي كده
تحياتي ووحشنييييييي

وله نهايه يقول...

يامستر صدق من قال
الجواز نهايه الحب
انا اعزب متعقد مسبقا منه
قالجواز جاز

وافتكر من قال
لعن من سبقني ولم ينصحني ولعن من سيتجوز بعدي ولم يقم بنصيحتي

سوسكــا يقول...

وانا كمان نفسي في كده
حلوة اووووي يابني احساسها عالي

سيبك اهم حاجة ... معملش الحاجات الوحشة اللي بيعملنا الناس الكبار دلوقتي خد بالك عشان انا باسيح

مصـ( الخير )ـعب يقول...

برضه من ساعة تدوينة ياء وأنت ما قلتليش مين ملكة اليمن السعيد<<

غير معرف يقول...

حمد كلامك رائع واكتر من رائع وان كان في نقطه مش موافقك عليها هي انك تحكي لاصحابك وهم يحسدوك.بس انا بتمني السعاده والهناء ليك مع الانسانه اللي بتحبها

غير معرف يقول...

جميل انك تحلم بحياه مليانه مشاعر ومودوخليك مصر على احلامك دى واكيد حتتحقق بس اوعى تحكى عنها كتير فى غيابها علشان الحسد طبعا ..مش مصدق ان الحسد بيأثرعلى الحب؟
ونصيحه اوعى تصدق الى بيقول ان الحب بيموت مع الزواج بالعكس الحب بيتولد مع اول يوم زواج بس اهم حاجه متخليش مشاكل الحياه تأثر على حبكم
وان شاء الله تعيش حياه احسن من الى بتحلم بيها

asmaa يقول...

حلو اوى انك تكون بتفكر كده بس ليا تعليقات صغيره اوىىىىىى لو ممكن اميلك اكون متشكره اوى

محمد السيد..مش حاسكت يقول...

mohamedmat@hotmail.com

شكرا علي المروووووووووووور يا افندم

غير معرف يقول...

مرسي ليك كتير يا محمد ويارب دايما تكون في تقدم مستمر

asmaa يقول...

مرسي ليك كتير يا محمد ويارب دايما تكون في تقدم مستمر