حتوحشنا

وحشتنا .... أحمد ... بجد وحشتنا

مكنتش عايز أبدأ بالبداية دي ... لأني لو مكانك مش حأحب حد يقول لي كده خالص.... لكن بجد .... وحشتنا .....

- يوم الجمعة اللي فات سافرت الإمارات ,أنا عرفت ليلتها .... كنت عايز أقولك كلام كتير لكن معرفتش ... وكنت عايز ألحق أقعد معاك لكن الوقت عدي بسرعة ...

أحمد ... يمكن مش حتقرأ الكلام ده لكن ممكن أقوله لك ....؟

- كنت بأقول لعمار إن الفراق والموت والحاجات دي مش بأحسها ... وإن الموقف حيعدي عليا عادي ... لكن بجد نظرة عينيك الخايفة وأسئلتك لينا تعمل إيه في وزن الشنطة؟؟ ولا تلبس إيه ؟؟ كانت صعبة أوي ....
إنت عارف إنك مش من النوع اللي يسأل علي حاجة أو يقبل من حد النصيحة ... لكن وإنت بتقولنا أعمل إيه ...

كان هاين علينا ندمع منك ...

أحمد بجد حتسافر؟؟؟

بجد حتقعد سنة بحالها مش حنشوفك؟؟؟

أحمد ...إحنا مع بعض أكتر من 12سنة.. يعني أكتر من نص عمرنا و دلوقتي تسافر ...؟ فاكر أول ما عرفنا بعض إمتي ؟؟؟

فاكر ... سنة خامسة ابتدائي ...

- استني أحكي لك حاجة يمكن تفتكر ... في فسحة المدرسة ... أنا فاكر لك حاجة إنت مش حتفتكرها ... في أول السنة ضرسي ورم واضطريت أغيب عن المدرسة ... وأيامها كانت امتحانات الشهر... ولما رجعت ... كنا واقفين مع أستاذ صبري في الحوش وإنت قلت له : "محمد لو كان امتحن كان طلع من الخمسة الأوائل ...."

جبت منين الرأي ده يا أحمد ؟ ؟ تعرف ؟

من ساعتها ........... وأنا رأيي إنك كنت بتبالغ ... لكن حأقول إيه ؟؟؟ ده رأيك...

فاكر سنة ثانية إعدادي ؟؟؟
- لما أستاذ صالح بهدلنا في حصة الهندسة؟؟؟ أنا مش ممكن أنسي اللحظة دي ...

يومها بعد ما شرح الدرس كله والناس كلها كتبت .. كان بيمر بين الصفوف ... لقي سيادتك وسيادتي بنتكلم

ومحدش فينا كتب حاجة ...فاكر يومها حصل فينا إيه ؟؟

إحنا الاتنين ؟

يومها يا أحمد .... مسح بينا السبورة ...أنا فاكر إنه طلعنا برة ونزل فينا ضرب بمسطرة الهندسة لما بهدلنا ....

وسمع المدرسة كلها بينا ....شفت معرفتك بيا ودتك فين ؟؟

أنا مكنتش عارف أشوفك كتير .. أو أتكلم معاك كتير ؟؟

بس بجد والله كنت شايفك من اقرب لناس ليا .عارف لما ترجع .... حأقولك ....

إني امبارح كنت قاعد مع أستاذ صبري وجبنا سيرتك ...آه والله....

وحأقولك إنه فاكر لك حاجة إنت كمان .... بعد 12 سنة.. قال لي :"أحمد سامي ده كان أول واحد أضربه في المدرسة ..."
ارجع بقي ...

- ده قال لي إنه ضربك ظلم ... اه والله بعدما ضربك إنت قلت له :" إنك كنت غايب يومها ..." قال لك :"مش كنت تقول طيب يا ابني ....."
مش كنت تقول له يا أحمد؟؟

ما ترجع بقي يا أخي ....

- مش حأفكرك بيوم ما كلمتني عن عمار وإحنا ماشيين علي البحر؟ ؟

وقلت لي إنت بتحبه قد إيه ؟ ؟ و إزاي أنه دخل قلبك علي طول وحاولت بكل طريقة تصاحبه وتكون معاه .... من أيام الثانوي ؟ ؟
- فاكر يا أحمد ؟ ؟ أنا بقي حأقول لك إنك بقيت دلوقتي أقرب واحد ليه ... ويوم سفرك قبل ما نيجي لك الساعة 2 بالليل ... كان بيقول لي : "أحمد حيسافر يا محمد" ... أ

نا كنت سامعه بيقولها بجد ....

عمار مكنش مستوعب إنك حتسافر عمار مش من النوع اللي يتأثر بالحاجات دي ... لكن والله كان بيقولها بجد ...

أحمد حيسافر يا محمد ....

أحمد حيسافر يا جماعة ....

- أنا رحت معاك نختم ورق الشهادة في القاهرة من القنصلية ... لكن مكنتش عارف إنك حتمشي بسرعة كده ...

فاكر يومها ..اتغدينا إيه ؟ ؟ ؟ واتفقنا إن الراجل اللي اتغدينا عنده أول يوم كان أحلي وأكتر و أزيد من تاني يوم ...

- فاكر يا أحمد ؟ ؟؟

- فاكر إني مشورتك ولففتك القاهرة كلها في يوم واحد ؟؟؟ وقعدت تدعي عليا ....؟ ؟

بهدلتك في العباسية ... وباب الشعرية ... والعتبة .... و المهندسين .... والهرم ... وبعد كده فيصل ..... ؟؟

حد يلف القاهرة كلها في يوم واحد مع صاحبه يا أحمد ؟

فاكر مصعب؟؟؟

- إنت اللي عرضت عليا نبات عنده ... وأنا كنت متردد...لكن بساطتك دي .. هي اللي بتحبب الناس فيك ....

قلت لي :"وإيه يعني ؟ ؟ اتصل بيه واعرض عليه .. وافق وافق ... موافقش خلاص..." يومها وافق مصعب طبعا .... وفعلا بيتنا عنده ...

علي فكرة هو سألني عليك الإسبوع اللي فات وبيسلم عليك ... وأنا كنت فاكرأقولك بس نسيت .....

ها ؟؟؟حتخلي بالك علي نفسك خلاص ؟؟

- وبعدين تعالي هنا؟ ؟ مستعجل ليه كده يا أخي ؟؟

- عايز تتأهل بسرعة ؟؟ فاكر يوم خطوبتك ؟ يومها إنت كنت فرحان أوي ...

إنت أول واحد فينا يعزم علي الخطوة دي ... بس بجد كان باين في عينيك وعينيها سعادة وفرحة الدنيا كلها ....

- أحمد ...متتأخرش عليها يا أحمد ...ارجع لها بسرعة ....

- يوم ما جينا لك ليلة السفر قلت لعمار:"أحمد حينزل متضايق؟ "

- كنت متضايق يا أحمد ؟؟؟ صح ؟؟

- ليه مألستش على شعري اللي خلاص معدش فاضل منه حاجة؟؟

- ولا ليه مضحكتش بصوت عالي زي عوايدك؟؟

- ليه يا أحمد ؟ ؟

أحمد مش عايز أطول ..ومش عايزك تزهق مني .....

- بس فاكر لما فتحت عليا اخر دقيقة في رصيدي ؟؟؟ ساعتها كنت واقف جوه المحل وأنا بره وأنا بأرن أستعجلك تخلص قمت إنت زي الـ ...... فاتح عليا علي طول من غير ما تبص علي الرقم ....يومها أنا عملت فرح ... وقلبتها ضلمة....وقفلت الليلة كلها ...

لكن ليلة سفرك ....

- إنت فتحت عليا برضه ... وكانت آخر دقيقة برضه... بس صدقني .. ساعتها فرحت أوي إنك فتحت علي ...

أحمد ...

- أنا آسف إنك يوم السفر قلت لي علي الياهو "السلام عليكم" وأنا مردتش ... مكنتش عارف إنك حتسيبنا وتسافر خلاص ...

- أنا آسف إني شديت معاك علي سجادة الصلاة ... مكنتش عارف إنك حتمشي بسرعة كده ...

- أنا آسف علي كل المرات اللي اتفقنا ننزل فيها كلنا... وكنت أنا السبب في تأخيركم ودعواتكم عليا ....
أحمد ...

إنت الوحيد من مجموعة المدرسة اللي كمل معانا رغم إنه ساكن بعيد عننا .... ورغم إننا عرفناهم قبلك .... لكن حنقول إيه ... القلوب بيد ربنا يقلبها كيف يشاء......

أحمد ...حتوحشنا أوي ...

لأ..... إنت خلاص ... وحشتنا ...

- وحشت خالك .. وجدتك .. وقرايبك ....

- وحشت عمرو ويحيي أوي ...

- وحشت أختك أوي .....

- وحشت خطيبتك أوي أوي ....

- وحشت أختك الصغير أوي أوي .... أحمد بيحبك أوي يا ميار ...

ميار متخفيش ... أحمد يوم ما سافر كان بيقول:

"إن الوحيدة اللي حسستني إني مسافر وزعلتني هي ميار ...."

- أحمد ... إنت وحشت مامتك أوي ....

واسمع كلامها بقي... دي وصيتها ليك قدامنا وشهدتنا عليك ...

لو تسمع صوتها وهي بتكلمني في التليفون عليك وفرحانة بيك علي سفرك واستلامك الشغل وإنك لقيت مكان للسكن خلاص ....

حتعرف ..... إنك وحشتها أوي يا أحمد ...

- إنت وحشت عمار أوي ... كده برضه ؟ ؟

- إنت وحشتني ... وحشتني أوي أوي أوي ...

يمكن دي أول مرة أقول لك الكلام ده ... ويمكن ... مكنتش أقدر اقوله لك لو إنت موجود دلوقتي ...بس بجد .... عايزك ترجع ....

بس قبل ما ترجع ...

- حقق كل االي كان نفسك فيه .... وانجح هناك واثبت نفسك علي الآخر ... وارجع كده وإنت مبسوط باللي حققته ... واللي عملته ...

- افتكر كل لحظة الناس اللي انت سافرت عشانهم ... وإنهم عايزينك ترجع أحسن مما رحت ... وإنهم كلهم مستنينك ترجع آه ... لكن ناجح وشاطر ومحقق أمانيك ...

أحمد ...حندعي لك علي طول...

وحنفضل نجيب في سيرتك - معلش بقي استحمل – ولو كنا كتبنا عليك حاجة ..... فده عشان كلنا ... كلنا بنحبك ....

محمد-عمار-يحيي-عمرو

وكل اللي بيحبوك

وحشتنا كلنا